A formación política cualifica a situación de “inadmisible e profundamente indecente” e alerta dunha “estrutura de poder machista” operando con impunidade
Movemento Sumar Galicia reclamou este mércores a dimisión “immediata” do presidente da Deputación Provincial de Lugo, ante as graves denuncias de acoso sexual que están a coñecerse no seo da institución provincial. A presidenta da formación, Verónica Barbero, advertiu en duros termos que “o que está ocorrendo na Deputación non é un caso illado, é a proba dunha estrutura de poder machista que operou durante anos con total impunidade”.
As declaracións de Barbero producíronse tras coñecerse varias acusacións nas últimas horas, que apuntan a un ambiente de abuso e silencio dentro da institución. A líder de Sumar Galicia cualificou a situación de “inadmisible e profundamente indecente” e denunciou que “a institucionalización do silencio e a protección dos agresores convertéronse nunha forma máis de violencia contra as mulleres”.
Dende a organización política insisten en que as múltiples denuncias non son unha excepción, senón a evidencia dun sistema que permitiu, amparou e normalizou comportamentos abusivos. “Cando unha institución permite que isto ocorra, cando minimiza ou tapa o que sucede, está dicíndolles ás mulleres que non serve de nada denunciar, que non serán cridas e que nada vai cambiar”, subliñou Barbero.
Esixencia de responsabilidades políticas
Movemento Sumar dirixiu tamén a súa demanda ao secretario xeral do PSdeG-PSOE, José Ramón Gómez Besteiro, a quen reclaman que “actúe de maneira inmediata e contundente fronte a estes feitos inaceptables”. Barbero fixo fincapé en que a responsabilidade política é xa “ineludible”.
“Quen preside unha institución e actúa deste xeito non pode seguir nin un minuto máis no cargo. Debe dimitir como presidente da Deputación e o PSOE debe apartalo de todos os seus cargos orgánicos, porque a democracia non admite zonas escuras nin pactos de silencio fronte ás violencias machistas”, afirmou a portavoz.
A formación deixou claro que a forma de actuar ante estes casos é o que define a unha organización democrática. “O mínimo que se lle pode esixir a un partido que se proclama feminista é non encubrir nin protexer ao culpable, senón reaccionar con rapidez, poñer ás mulleres no centro e garantir a súa protección inmediata”, sinalaron.
Apoio ás denunciantes e chamada á acción
Finalmente, Movemento Sumar Galicia trasladou o seu “apoio absoluto” ás mulleres que deron o paso de denunciar, recoñecendo a súa valentía. “Son elas quen están rachando o muro da impunidade. Agora tócalle á política demostrar que está á altura, asumir responsabilidades e deixar de ser cómplice dun sistema que leva demasiado tempo protexendo aos de sempre”, concluíu Barbero.
A crise na Deputación de Lugo coloca ao goberno provincial, tradicionalmente en mans do PSdeG, nun foco de presión política e social, nun momento no que a loita contra o acoso e as violencias machistas segue no centro do debate público.